क्रांतिवीर दत्तोबा भोसले विचार व्याख्यान संपन्न; गोविंदलाल कन्हैयालाल जोशी (रात्रीचे) वाणिज्य महाविद्यालयात राष्ट्रीय सेवा योजनेअंतर्गत आयोजन
लातूर (प्रतिनिधी): श्री. हरिहर प्रतिष्ठान संचलित गोविंदलाल कन्हैयालाल जोशी (रात्रीचे) वाणिज्य महाविद्यालय, लातूर येथे राष्ट्रीय सेवा योजना अंतर्गत क्रांतिकारकांच्या जीवनावर प्रकाश टाकण्यासाठी 'क्रांतिवीर दत्तोबा भोसले विचार व्याख्यान' कार्यक्रमाचे यशस्वी आयोजन करण्यात आले. क्रांतिवीर दत्तोबा भोसले यांसारख्या क्रांतिवीरांच्या विचारांचा वारसा तरुण पिढीपर्यंत पोहोचावा, या उद्देशaने आयोजित करण्यात आलेल्या या व्याख्यानात प्रमुख व्याख्यात्या म्हणून डॉ. नयन भादुले-राजमाने यांनी विचार मांडले, तर कार्यक्रमाच्या अध्यक्षस्थानी महाविद्यालयाच्या प्राचार्य डॉ. सुजाता चव्हाण या होत्या.
कार्यक्रमाची सुरुवात क्रांतिवीर दत्तोबा भोसले यांच्या प्रतिमेस पुष्पहार अर्पण करून झाली. त्यानंतर प्रा. प्रिती पाचंगे यांनी प्रास्ताविक करून कार्यक्रमाच्या आयोजनामागील भूमिका स्पष्ट केली.
प्रमुख व्याख्यात्या डॉ. नयन भादुले-राजमाने यांनी आपल्या अभ्यासपूर्ण मांडणीतून क्रांतिवीर दत्तोबा भोसले यांच्या स्वातंत्र्यलढ्यातील आणि सामाजिक क्षेत्रातील योगदानाचा पट उलगडला. दत्तोबा भोसले यांचे राष्ट्रप्रेम, निष्ठा आणि सामाजिक बांधिलकी आजही तेवढीच मार्गदर्शक असल्याचे त्यांनी स्पष्ट केले. तसेच, रात्रीच्या महाविद्यालयात शिक्षण घेणाऱ्या कष्टकरी आणि जिद्दी विद्यार्थ्यांनी प्रतिकूल परिस्थितीवर मात करत स्वतःचे व देशाचे भविष्य घडवावे, असे प्रेरणादायी आवाहन त्यांनी यावेळी केले.
अध्यक्षीय समारोप करताना प्राचार्य डॉ. सुजाता चव्हाण यांनी सामाजिक जाणिवा समृद्ध करण्यासाठी अशा व्याख्यानांची गरज अधोरेखित केली. केवळ पदवी न मिळवता महापुरुषांचे विचार आणि नीतिमूल्ये आचरणात आणून विद्यार्थ्यांनी सुजाण व जबाबदार नागरिक बनावे, हाच अशा उपक्रमांचा मुख्य हेतू असतो, असा मोलाचा संदेश त्यांनी आपल्या अध्यक्षीय भाषणातून दिला.
कार्यक्रमास महाविद्यालयातील प्राध्यापकवृंद, शिक्षकेतर कर्मचारी आणि मोठ्या संख्येने विद्यार्थी उपस्थित होते. कार्यक्रमाचे सूत्रसंचालन प्रा. अनिता चौधरी यांनी केले, तर आभार प्रा. टिना बोरा यांनी मानले. राष्ट्रगीताने व्याख्यानाची सांगता झाली.
टिप्पणी पोस्ट करा